لاڑکانہ ۔27دسمبر(اے پی پی) مسلم دنیا تے پاکستان دی پہلی تریمت وزیراعظم شہید محترمہ بے نظیر بھٹو دی پندرہویں برسی سندھ دے شہر گڑھی خدابخش اچ منائی ڳئی ۔سابق وزیراعظم محترمہ بے نظیر بھٹو 21 جون 1953 کوں کراچی اچ ڄمیاں تے سیاست دے میدان اچ قدم مارشل لاءدے خلاف جدوجہد نال رکھیا ، بے نظیر بھٹو دی تربیت دا آغاز اقوام متحدہ دی سلامتی کونسل دے اجلاس اتے شملہ معاہدے دے یادگار موقع تے شرکت توں تھیا ،30 سالہ سیاسی کیرئیر اچ محترمہ بے نظیر بھٹو صرف ساڈھے چار سال حکومت اچ رہی، سیاسی آزمائشاں دا اپݨے تدبر اتے بہادری نال ڈٹ تے مقابلہ کیتا، محترمہ بے نظیر بھٹو لیاری، لاڑکانہ، لاہور دے سیاسی میداناں کوں آباد کرݨ دے نال نال ہر شعبہ زندگی دے طاقتور حلقیں دا مقابلہ کیتا،ݙو واری وزیراعظم منتخب تھیوݨ آلی بے نظیر بھٹو خود ساختہ جلا وطنی ختم کرتے 18 اکتوبر 2007 کوں وطن واپس پڄیں تاں کراچی ائیرپورٹ تے جیالیں انہاں دا بھرپور تاریخی استقبال کیتا ۔ شاہراہ فیصل کارساز دے مقام تے انہاں دے ٹرک دے نیڑے ݙو زوردار دھماکے تھئے جیں اچ ھک سو 40 توں ودھ لوک جاں بحق تے ٻہوں سارے زخمی تھئے ، دہشت گرد حملے دے باوجود محترمہ بے نظیر شہید جمہوریت دی خاطر اپݨی جان دی پرواہ تئیں نی کیتی تے سخت خطرات دے باوجود 27 دسمبر 2007 کوں لیاقت باغ راولپنڈی جلسہ گاہ پڄاں جتھاں جلسہ مکݨ تے انہاں کوں شہید کرݙتا ڳیا ۔
