شنگھائی ۔15ستمبر(اے پی پی)صدر مملکت آصف علی زرداری شنگھائی الیکٹرک دے چیئرمین وو لی نال ملاقات کیتی اتے بعد اچ شنگھائی اچ کمپنی دیاں سہولتاں دا دورہ کیتا، خاتون اول آصفہ بھٹو زرداری، چیئرمین پاکستان پیپلز پارٹی بلاول بھٹو زرداری اتے سینیٹر سلیم مانڈوی والا وی انہاں دے نال ہن۔ ایوان صدر دے پریس ونگ توں جاری بیان دے مطابق شنگھائی الیکٹرک دے چیئرمین پاکستان اچ کمپنی دے منصوبیاں بارے بریفنگ ݙتی جیندے اچ تھر دے کوئلے، ایٹمی توانائی اتے کوئلے توں ٻجݨ آلے پاور پلانٹس شامل ہن۔ صدر مملکت پاکستان دیاں توانائی ضرورتاں پورے کرݨ اچ شنگھائی الیکٹرک دے کردار دی تعریف کریندے آکھیا جو شنگھائی الیکٹرک روزگار دے موقع تے سماجی و معاشی ترقی اچ اہم کردار ادا کیتے۔ صدر شنگھائی الیکٹرک کوں پاکستان دے ٹرانسمیشن اتے ڈسٹری بیوشن نظام اچ سرمایہ کاری دی دعوت ݙیندے یقین دہانی کرائی ڄیکر کوئی زیر التواء مسئلے ہوئے تاں انہاں کوں دوستانہ اتے آپسی تعاون دے جذبے تحت حل کیتا ویسی۔ شنگھائی الیکٹرک دے سی ای او پاکستان اچ آپݨے ملازماں کیتے ݙتی ڳئی سکیورٹی دے انتظامات تے حکومت دا شکریہ ادا کیتا۔ صدر مملکت یقین ݙیوایا جو پاکستانی حکومت چینی ملازماں کیتے محفوظ اتے سازگار ماحول یقینی بݨاوݨ کیتے حفاظتی اقدامات کوں ودھایسی۔ صدر مملکت کوں بریفنگ اچ ݙسایا ڳئے جو شنگھائی الیکٹرک 1902 اچ قائم تھئی اتے او توانائی اتے صنعتی شعبے اچ عالمی مقام رکھیندی اے۔ ایں موقع تے تھر اچ کوئلہ گیسیفیکیشن پلانٹ دے قیام کیتے مفاہمت دی یادداشت تے دستخط وی تھئن۔ اے تھر کوئلے تے مشتمل پہلا کوئلہ گیسیفیکیشن اتے فرٹیلائزر منصوبہ ہوسی جیڑھا توانائی دیاں ضرورتاں پوری کرݨ دے نال زرعی شعبے کوں وی سہارا ݙیسی۔ ایم ایف ٹی سی کول گیسیفیکیشن دے سی ای او شاہد تواوالا اتے سینو سندھ ریسورسز/شنگھائی الیکٹرک دے سی ای او لن جیگن یادداشت تے دستخط کیتے۔ ایں موقع تے خاتون اول آصفہ بھٹو زرداری اتے چیئرمین پیپلز پارٹی بلاول بھٹو زرداری وی صدر مملکت دے نال ہن۔ سینیٹر سلیم مانڈوی والا، وزیر اطلاعات و ٹرانسپورٹ سندھ شرجیل میمن اتے وزیر منصوبہ بندی و توانائی سندھ سید ناصر شاہ دے علاوہ چین اتے پاکستان دے سفیر وی ایں موقع تے موجود ہن۔
